Previous Previous:
From Troilus and Criseyde, Book III, lines 1772-1820:
About Troilus and Ector
Librarius Homepage
© Librarius
All rights reserved.

Geoffrey Chaucer (1342 - 1400):
Troilus and Criseyde
Book IV, lines 1-28: Prologue


But al to litel, weylaway the whyle,
Lasteth swich joye, y-thonked be Fortune!
That semeth trewest, whan she wol bygyle,
And can to foles so hir song entune,
5That she hem hent and blent, traytour comune;
And whan a wight is from hir wheel y-throwe,
Than laugheth she, and maketh him the mowe.

From Troilus she gan hir brighte face
Awey to wrythe, and took of him non hede,
10But caste him clene out of his lady grace,
And on hir wheel she sette up Diomede;
For which right now myn herte ginneth blede,
And now my penne, allas! With which I write,
Quaketh for drede of that I moot endite.

15For how Criseyde Troilus forsook,
Or at the leste, how that she was unkinde,
Moot hennes-forth ben matere of my book,
As wryten folk through which it is in minde.
Allas! That they sholde ever cause finde
20To speke hir harm; and if they on hir lye,
Ywis, hemself sholde han the vilanye.

O ye Herines, Nightes doughtren three,
That endelees compleynen ever in pyne,
Megera, Alete, and eek Thesiphone;
25Thou cruel Mars eek, fader to Quiryne,
This ilke ferthe book me helpeth fyne,
So that the los of lyf and love yfere
Of Troilus be fully shewed here.

Explicit prohemium.

Next Next:
From Troilus and Criseyde, Book IV, lines 29-146:
Trojans and Greeks fight fiercely and Antenor is captured by the Greeks