Previous Previous:
From Troilus and Criseyde, Book V, lines 414-434:
Pandarus suggests to visit king Sarpendoun
Librarius Homepage
© Librarius
All rights reserved.

Geoffrey Chaucer (1342 - 1400):
Troilus and Criseyde
Book V, lines 435-511: Troilus and Pandarus feast at Sarpendoun's and return to Troy

435This Sarpedoun, as he that honourable
Was ever his lyve, and ful of heigh prowesse,
With al that mighte y-served been on table,
That deyntee was, al coste it greet richesse,
He fedde hem day by day, that swich noblesse,
440As seyden bothe the moste and eek the leste,
Was never er that day wist at any feste.

Nor in this world ther is non instrument
Delicious, through wind, or touche, of corde,
As fer as any wight hath ever ywent,
445That tonge telle or herte may recorde,
That at that feste it nas wel herd acorde;
Ne of ladies eek so fayr a companye
On daunce, er tho, was never yseyn with ye.

But what avayleth this to Troilus,
450That for his sorwe no thing of it roughte?
For ever in oon his herte pietous
Ful bisily Criseyde his lady soughte.
On hir was ever al that his herte thoughte,
Now this, now that, so faste imagininge,
455That glade, iwis, can him no festeyinge.

These ladies eek that at this feste been,
Syn that he saugh his lady was a-weye,
It was his sorwe upon hem for to seen,
Or for to here on instrumentz so pleye.
460For she, that of his herte berth the keye,
Was absent, lo, this was his fantasye,
That no wight sholde make melodye.

Nor ther nas houre in al the day or night,
Whan he was ther as no wight mighte him here,
465That he ne seyde, `O lufsom lady bright,
How have ye faren, syn that ye were here?
Welcome, ywis, myn owene lady dere.'
But welaway, al this nas but a mase;
Fortune his howve entended bet to glase.

470The lettres eek, that she of olde tyme
Hadde him ysent, he wolde allone rede,
An hundred sythe, a-twixen noon and pryme;
Refiguringe hir shap, hir womanhede,
Withinne his herte, and every word and dede
475That passed was, and thus he droof to an ende
The ferthe day, and seyde, he wolde wende.

And seyde, `Leve brother Pandarus,
Intendestow that we shal here bleve
Til Sarpedoun wol forth congeyen us?
480Yet were it fairer that we toke our leve.
For Goddes love, lat us now sone at eve
Our leve take, and homward lat us torne;
For trewely, I nil not thus sojourne.'

Pandare answerde, `Be we comen hider
485To fecchen fyr, and rennen hoom ayeyn?
God helpe me so, I can not tellen whider
We mighten goon, if I shal soothly seyn,
Ther any wight is of us more fayn
Than Sarpedoun; and if we hennes hye
490Thus sodeinly, I holde it vileynye.

`Syn that we seyden that we wolde bleve
With him a wouke; and now, thus sodeynly,
The ferthe day to take of him oure leve,
He wolde wondren on it, trewely!
495Lat us holde forth our purpos fermely;
And syn that ye bihighten him to byde,
Hold forward now, and after lat us ryde.'

Thus Pandarus, with alle peyne and wo,
Made him to dwelle; and at the woukes ende,
500Of Sarpedoun they toke hir leve tho,
And on hir wey they spedden hem to wende.
Quod Troilus, `Now God me grace sende,
That I may finden, at myn hom-cominge,
Criseyde comen!' And therwith gan he singe.

505`Ye, hasel-wode!' thoughte this Pandare,
And to himself ful softely he seyde,
`God woot, refreyden may this hote fare,
Er Calkas sende Troilus Criseyde!'
But nathelees, he japed thus, and seyde,
510And swor, ywis, his herte him wel bihighte,
She wolde come as sone as ever she mighte.

Next Next:
From Troilus and Criseyde, Book V, lines 512-602:
Troilus and Pandarus go to Criseyde's empty house